Heldur sýnist mér vanhugsað að leita til Bandaríkjanna varðandi Icesave.  Þar má eflaust finna skilning á erfiðleikum Íslands, en varla vilja til að blanda sér í málið. 

Í áratugi voru íslenskir stjórnmálamenn sem blóðsugur á Bandaríkjamönnum og svifust einskis í að kúga úr þeim fjármuni og stuðning í öllum vanda.  Hrokinn var alger og hverri gjöf fylgdu kröfur um meira.  Hótað og grátið á víxl. 
Ummæli háttsettra í Bandaríkjunum, frá þessum tíma, sýna að menn voru oft og tíðum hundleiðir á frekjunni. 

Í þá daga gátu Íslendingar þvingað Bandaríkin til afskipta í átökum við Breta.  Með hótunum um vinslit og flótta í faðm kommúnista.

Talað var um ofríki hinna smáu; ógeðfellda kúgunartilburði íslenskra stjórnmálamanna.  Háttsettir urðu að fallast á kröfurnar, því lega Íslands þótti mikilvæg.
En mönnum dreymdi um að segja Íslendingum að eiga sig.

Það er varla hægt að áfellast Bandaríkjamenn fyrir að segjast hlutlausir í deilunni.

Tilvísa Furl Facebook Vista PDF Prenta Senda