Ég sé hópur Íslendinga vill færa klukkuna aftur um allt að tvo tíma (GMT -2.00), svo birtan verði meiri að morgni til og dyntum svonefndrar líkamsklukku betur fullnægt (sjá tillöguna í heild sinni neðst í blogginu).

Í Bretlandi hefur verið rætt um hina leiðina - þ.e. að færa hana fram.

Brown hefur lofað að skoða hvort halda megi sumartímanum (GMT +1.00) yfir allt árið.  Einnig kæmi til greina að færa núverandi fyrirkomulag fram um eina klukkustund, svo sumrin færðust tveim tímum framar (GMT +2.00) en veturnir yrðu eins og sumartíminn er núna (GMT +1.00).

Þannig gæfist meiri tími til að njóta sólar eftir vinnu.  Að sögn mun þetta valda vexti í sölu þjónustu til túrista, börn verða heilbrigðari (leika sér heldur úti eftir skóla) og öruggara verður að keyra heim eftir vinnudaginn.  Einhverjir segja þetta muni einnig fækka glæpum.

Brown hefur velt fyrir sér að gera þetta til þriggja ára, til prufu.  En auðvitað gæti hann, í næsta skapvonskukasti slegið það af.  Hver veit.

Í mínum huga er þetta, líkt og einn viðmælanda Telegraph sagði, "no brainer".

Satt best að segja gæti mér ekki staðið meira á sama um birtu þegar ég vakna, eða er á leið til vinnu.  Þó átta sólir væru á lofti, væri ég samt fúll.  Líklega liði mér verr eftir því sem bjartara væri - því fallegum degi vildi ég eyða í annað en vinnu.

Það sem skiptir mig máli eru aðstæður þegar ég kem heim.  Ef dimmt er og drungalegt, fer ég heldur í sófann, sjónvarpsgláp eða tölvufikt.  Meiri birta eykur líkurnar á ég fari út og hreyfi mig dálítið.  Reyndar hreyfi ég mig helst aldrei, en látum sem þetta sé satt.

Án þess ég muni nákvæmlega hvernig sólin skín á Ísland, yfir vetrarmánuðina, hefði ég haldið mikilvægt að kanna rækilega báðar hliðar.  Bjartari morgnar á móti myrkum eftirmiðdögum.

Í ljósi þess hópurinn tiltekur sérstaklega í rökum sínum að forðast beri að vera á sama tíma og Bretar (væntanlega í kerskni), yrði þó stórgott ef Bretar og Íslendingar breyttu báðir samkvæmt ítrustu tillögum. 

Það yrðu þá þrjár klukkustundir milli þjóðanna yfir vetrarmánuðina, en fjórar á sumrin.

Breytum klukkunni á Íslandi!

Sá sem skoðar mynd af tímabeltunum sér að eitthvað er bogið við klukkuna á Íslandi. Hann sér að allt landfræðilega er allt Ísland einum tíma á eftir þeim tíma sem Ísland ákveður að vera á. Landfræðilegi tíminn í Reykjavík er mjög nálægt því að vera tveimur tímum frá því sem hann er núna. Ísafjörður nær því alveg, og er tveimur heilum tímabeltum frá raunverulegum tíma.

Það þýðir að þegar Íslendingar og Bretar fara á fætur á sama tíma klukkan 7, er birtan hjá okkur eins og klukkan sé 5. Taki maður mark á alvöru rannsóknum sem gerðar hafa verið á líkamsklukku okkar má sjá að við lifum ekki í takt við hana.

Með þessari tilskipun nýtum við þá litlu birtu sem okkur berst á veturnar verr, við erum að vakna um miðjar nætur.

Og þar fyrir utan erum við að stilla okkur með Bretum! Sýnum þeim að við göngum ekki þeirra erinda og kennum þeim þá lexíu að við ráðum sjálf hvað við gerum!

Er þetta hægt? Já, það eina sem þarf að gerast er að Alþingi fjalli um þetta og samþykki!
(Facebook tillaga)

Tilvísa Furl Facebook Vista PDF Prenta Senda